Advertisement

कवटाळुन घे भ्रमरा मजला

अक्षरगणवृत्त -तोटक 

संग 

बिलगून तुला समजावू कसे 
उडतोस कवेतुन दूर असे 
कवटाळून घे भ्रमरा मजला 
मकरंद हवा अधरामधला

दव वेचुन गर्द धुक्यामधले 
ऋतु मंतरलेत उन्हामधले 
क्षण धुंद हवा प्रणयामधला  
कवटाळुन घे भ्रमरा मजला 

चिरस्पर्श तुझे हलके स्मरुनी 
मद पाजळते अजुनी रजनी 
मधुचंद्र हवा तिमिरामधला 
कवटाळुन घे भ्रमरा मजला 

तनु मोहरली निमिषात जरी 
मन व्याकुळते सुकुमार तरी 
खण आसुसतो हृदयामधला 
कवटाळुन घे भ्रमरा मजला 

विजनात सुरू कर संग तुझा 
गगनास पडो परि मोह तुझा 
घन तृप्त करू विवरामधला 
कवटाळुन घे भ्रमरा मजला 

Post a Comment

0 Comments